- London Chess Classic (5R). Carlsen, Anand e McShane: triunvirato

O número 2 do mundo, Magnus Carlsen, venceu a David Howell na súa partida da quinta rolda cando o inglés nos apuros de tempo deixouse un cabalo nunha posición igualada. Deste xeito acadou os 9 puntos, que o colocan empatado na cabeza cos dous anteriores colíderes.
Anand e McShane, que tiñan 8 puntos, fixeron táboas nunha española berlinesa nunha partida sen grandes sobresaltos. Isto fai que a falta de dúas partidas teñamos tres xogadores primeiros.
O americano Nakamura tumbou ao Marshall de Short, quen escolleu a liña 9...e4 atacando o cabalo en troques da habitual 9...Cxd5. Non saiu ben o experimento, porque o inglés tivo que abandonar na xogada 34 ao chegar a un final perdidísimo.
Na cuarta partida da rolda Adams e Kramnik fixeron táboas. Adams xogou a española e atopouse co Muro de Berlin de Kramnik, aquel que acabou con Kasparov. Algún intento agresivo dos dous xogadores pero moi pronto a posición non daba para máis que deixalo en táboas.
As partidas en Chessbase.
Hoxe día de descanso, con Carlsen, Anand e McShane con 9 puntos. Nakamura e Kramnik están moi cerca, con 8. Adams ten remotas opcións con 6. Finalmente Howell e Short con 2 e 1 punto non teñen nada que facer.